གཅེར་བུ་པའི་སྙན་གསར་ཁག་གཉིས།

རྩོམ་ཡིག་འདི་ཐེངས་ 580 བཀླགས་འདུག

༈ ཚིག་གི་སྲད་བུ།

ཆང་ཁང་རྙིང་སོང་དེ་ན་རླུང་བུ་ལྡང་།།
རླུང་བུ་དེ་ནི་དེ་འདྲ་ཆ་མེད་ཅིག།

སྔོན་དུས་མི་ཚོགས་འཚང་བཞིན་འདུ་ས་དེར།།
ཁྱེད་རང་འཚོ་བའི་མིག་ཅིག་ད་དུང་ཡོད།།

སྨུག་པས་བྲིས་པའི་གཏམ་རྒྱུད་བརྗེད་མེད་ཅིག།
ཁངས་ཆར་འབབ་པའི་ཡུལ་དེར་ལུས་ན་ཡང་།།
ནམ་ཟླ་མང་དུ་བརྗེས་པའི་འཕྲོ་མ་ལ།།
སུ་ནི་སུ་ཡི་སེམས་ཀྱི་འཇའ་རུ་གྱུར།།

གོམ་ཁ་གློད་སའི་རི་ལུང་རྫོགས་མཐའ་མེད།།
བརྩེ་བའི་གནམ་ས་འདི་ལ་ཕ་མཐའ་མེད།།
ཡིན་ཡང་སངས་རྒྱུ་མེད་པའི་སྐྱོ་བ་ཡིས།།
འཁོར་བའི་ཐང་ཆེན་འགྲུལ་ལ་ཞལ་ཏ་གནང་།།

ཚུར་ལ་འཁོར་ནས་རང་སེམས་རང་གིས་གསོས།།
ཕར་ལ་ཕྱོགས་ནས་བརྩེ་བའི་མོལ་མཆིད་བཏབ།།
ཕན་ཚུན་འཚོ་བའི་དམ་ཚིག་འདི་ཙམ་སྟེ།།
འུ་ཅག་ཞེ་འཁོན་བྱ་ལ་དགོས་པ་ཅི།།

ཚ་བས་སྦགས་པའི་མཁའ་དབུགས་རྫོབ་པ་ལ།།
བརྩེ་བ་བྲལ་བའི་ལོ་ཟླ་རིང་བ་ལ།།
མཛེས་པས་དུབ་པའི་སེམས་པ་ཆུང་བ་ལ།།
སྐྱིད་སྡུག་འཚོ་བ་འབོད་པ་འདི་ཡིན་ནམ།།



སྐྱོ་གདུང་།

དུས་ཚོད་དེ་ཚེས་སོང་
སྨུག་པ་ལུད་པའི་རི་གྲོང་དག་ན
མཛེས་སྡུག་ཁོ་ནས་སྐྱོ་བ་འཁྱེར
ར་རོ་བའི་ན་ཚོད་འདི་ལ
གཅེས་པར་འོས་པ་ཅི་ཞིག་མཆིས

སེམས་འདི་ང་ལ་དབང་ན
སླུ་བྲིད་ལྟ་བུ་སྤྲོ་སྣང་དང་
ཡལ་སླ་བའི་དཔྱིད་ཀ་ཁོ་ནར་སྨོན་དོན་ཅི
ན་ཚོད་འདི་ཡི་ཐེག་དཀའ་བའི་སྡུག་བསྔལ་དག
ཁྱོད་ཁོ་ནས་ཁུ་སིམ་སིམ་དུ་མྱོང་གིན་འདུག

གཅེར་བུ་པ། 2020.7.3