བཀའ་དྲིན་ཆེ།

རྩོམ་ཡིག་འདི་ཐེངས་ 522 བཀླགས་འདུག

བཀའ་དྲིན་ཆེ།

ཆབ་བྲག་ཕོ་ཉ། ཧྥ་རན་སི།

དབྱར་ཁའི་ཚ་བས་གདུང་བའི་བྱེ་ཐང་དུ།།
སྐོམ་པས་ཁ་ལྕེ་སྐམ་པའི་འགྲུལ་བཞུད་པར།།
དྭངས་བསིལ་སྐོམ་ཆུ་ཁམ་འགའ་ལྡུད་མཁན་སུ།།
དེ་ཡི་བཀའ་དྲིན་གཙང་བོའི་རྒྱུན་ལས་ལྷག།

དགུན་ཁའི་ཙག་གིས་གདུང་བའི་གངས་ཐང་དུ།།
གྲང་བས་རྐང་ལག་འཁུམས་པའི་རྒྱང་བཞུད་པར།།
དྲོ་འཇམ་གནས་མལ་ཐེངས་གཅིག་གཡོར་མཁན་སུ།།
དེ་ཡི་བཀའ་དྲིན་ཉི་མའི་འོད་ལས་ལྷག།

རྒ་བའི་ཁུར་གྱིས་གདུང་བའི་མལ་ས་རུ།།
ཟུག་རྔུས་འོ་དོད་འབོད་པའི་ནད་པ་ལ།།
གཟེར་འཇོམས་སྨན་ཐུན་འགའ་ཞིག་སྦྱིན་པ་སུ།།
དེ་ཡི་བཀའ་དྲིན་བདེ་སྦྱིན་ལྷ་ལས་ལྷག།

ཁེར་རྐྱང་སྡུག་གིས་མནར་བའི་ཐང་སྟོང་དུ།།
ལྟོགས་པས་ལུས་ཟུངས་ཟད་པའི་སློང་མོ་བར།།
རོ་བཅུད་བཟའ་བཏུང་ཐེངས་གཅིག་སྟེར་བ་སུ།།
དེ་ཡི་བཀའ་དྲིན་གསེར་གྱི་རི་ལས་ལྷག།

ཇག་པའི་དཔུང་གིས་བདས་པའི་གཞན་ཡུལ་དུ།།
མགོན་མེད་ཉམ་ཐག་གྱུར་པའི་དྭ་ཕྲུག་ཚོར།།
ཕངས་མེད་ནོར་གྱིས་ཡང་ཡང་སྐྱོང་བ་སུ།།
དེ་ཡི་བཀའ་དྲིན་ཕ་མ་ལས་ཀྱང་ལྷག།

དཀའ་བའི་དུས་སུ་ཕན་པའི་རོགས་བྱེད་པ།།
དེ་དང་དེ་ནི་གྲོགས་ཀྱི་མཆོག་ཡིན་ལ།།
བྱམས་དང་བརྩེ་བའི་ལྷ་ཡང་དེ་ཉིད་དེ།།
དྲིན་ཤེས་དྲིན་གཟོ་གཏན་བདེའི་སྨོན་ལམ་འདེབས།།